Dar es Salaam

Na Nicolaus Kilowoko

Mkuu wa kitengo cha habari na mawasiliano ndani ya klabu ya soka ya Azam FC, Thabit Zacharia maafuru Zaka Zakazi amegeuka na kumkingia kifua kocha wao, Florent Ibenge kutokana na klabu hiyo kuwa na mwendelezo wa matokeo yasiyofaa uwanjani.
Zaka alisema kwa sasa wanaendelea kufanya maboresho makubwa ya timu yao hivyo mashabiki watulie kwani kocha anaelewa matamanio yao na kuna mabadiliko makubwa ya kiufundi kwa sasa yanafanyika.
Alisema kuwa mara nyingi mashabiki wanatamani kuona klabu yao ikifanya vizuri na hilo wanalifahamu hivyo kupata sare mbili haipaswi wao kukata tamaa na kutoa lawama kubwa kwa uongozi wao.
“Haitoshi kuhukumu katika mechi hizi mbili za mwanzo, mpira unabadilika kwani tumeshuhudia Kombe la Dunia lililoisha juzi tu, Hispania alianza vibaya lakini ndiye aliyekuwa bingwa, hivyo watu wasikate tamaa na kulaumu kwa sare hizi mbili za mwanzo tulizopata,” alisema Zaka.
Alisisitiza kuwa kwa maboresho ambayo kwa sasa wanaendelea nayo mara baada ya kupata mapumziko ya mashindano ya Afrika yamesaidia kocha wao Ibenge kuongeza kitu kwa wachezaji wake ambacho wanaamini kitaisaidia timu hiyo kufanya vizuri kwa mechi zijazo.
Zaka alisema hata kipindi kile ambacho wanakuwa mabingwa mwaka 2013 mechi zilikuwa kama hivi ambavyo matokeo wanayapata kwa sasa na walifanikiwa kutwaa ubingwa wa Ligi hiyo.
Aliongeza kuwa Ibenge ni kocha mzoefu na mara nyingi mashabiki wanapoona matokeo mabaya hawaangalii wachezaji, kwanza wanaangalia kocha na hiyo ndiyo gharama kwake lakini kwa kikosi walichonacho msimu huu wapo vizuri kutokana na usajili walioufanya.

Dar es Salaam

Na Nicolaus Kilowoko

Mkurugenzi wa Utawala wa Shirikisho la Mpira wa Wavu Tanzania (TVF) ambaye pia ni  Mwenyekiti wa Bodi ya Ligi, Riziki Godwin, amekiri kuwa miundombinu waliyoiweka kwa sasa hasa mara baada ya kuupata Uwanja wa Mwembeyanga, imechangia kwa kiasi kikubwa uimara wa mchezo huo kwa Mkoa wa Dar es Salaam.
Riziki alisema kuwa kwa sasa wanaendelea na Ligi ya Wavu ambayo kwa kiasi kikubwa wamefanikiwa sana kutokana na timu ambazo zimekubali ushiriki wake na hilo linatokana na kuboreshwa kwa miundombinu ya uwanja ambapo hapo awali ilikuwa ni changamoto kubwa kwao.
Alisema ushindani wa ligi hiyo ambayo kwa sasa inaendelea umeongezeka, kwanza ni kutokana na timu shiriki kutamani kuonesha uwezo na mabadiliko yao kutokana na ligi hiyo inafanyika kila mwaka hapa nchini.
Aliongeza kuwa mbali na hilo, ligi hiyo inatumika kwa kuandaa timu wakati wa mashindano ya msimu ujao hivyo hata ushindani wake umeongezeka kiasi kikubwa na timu zinaelewa kabisa kama zitashindwa kufanya vizuri kwa sasa zitakuwa na wakati mgumu msimu ujao wa ligi hiyo.
Riziki alisema ubora wa viwanja mara ya kwanza ulikuwa kikwazo kwa timu kuonesha uwezo wao lakini kwa sasa wanajivunia kuona maendeleo makubwa yanafanyika katika timu hizo.

Dar es Salaam

Na Mwandishi wetu

Bodi ya Ligi Kuu imesema uwepo wa teknolojia mpya ya VS pamoja na mfumo wa kisasa wa kukata tiketi kwenye mechi za Ligi hiyo, umesaidia kupunguza malalamiko dhidi yao kutoka kwa mashabiki.
VS (Video Support) ni teknolojia mbadala ya video iliyoanza kutumika katika msimu huu ikichukua nafasi ya VAR (Video Assistant Referee) ambayo husaidia waamuzi kufanya mapitio ya matukio kadhaa yenye utata uwanjani.
Akizungumza hivi karibuni, Afisa Habari wa Bodi hiyo, Yahya Abushehe amesema mwenendo wa Ligi hiyo ni mzuri hasa katika raundi za kwanza za michezo yake.
Alisema msimu umeanza vizuri kwa maamuzi mengi kufanyika bila malalamiko katika mechi kadhaa zilizokuwa na matukio ya utata ambayo yaliamriwa na teknolojia hiyo ya VS.

Dekano wa Dekania ya Mtakatifu Petro, Padri Elidius Kibangura (wa pili kushoto) akiwa na viongozi mbalimbali na Waamini wa Parokia ya Mtakatifu Karoli Lwanga Tandale baada ya kuwapatia Sakramenti Takatifu ya Kipaimara waimarishwa 17.

Na Pd. Richard Mjigwa, C.PP.S

Jalai 12, kila mwaka, Mama Kanisa huadhimisha Dominika ya Utume wa Bahari, ikiwa ni Siku ya kumwomba, kumtukuza, kumsifu na kumshukuru Mungu kwa huduma yao.
Hakika ni mchango mkubwa, unaotolewa na mabaharia hao, pamoja na wavuvi, kwa ajili ya ustawi, maendeleo na mafao ya wengi.
Kwa kawaida, hiyo ni siku maalumu ya kutambua mchango na sadaka ya watu hao, ambao wakati mwingine, utu na heshima yao vinahatarishwa kutokana na changamoto mbalimbali, wanazokumbana nazo kila siku.
Utume wa Bahari, “Opus Apostolatus Maris”, unaojulikana na wengi kama “Stella Maris”, ulianzishwa tarehe 4 Oktoba 1920, na Waamini Walei wanaoshiriki: Ukuhani, Unabii na Ufalme wa Kristo Yesu, unaopata chimbuko lake kutoka katika Sakramenti ya Ubatizo.
Ni jukumu na wito wa Waamini Walei, kuutafuta Ufalme wa Mungu, unaosimikwa katika kweli na uzima; ni ufalme wa utakatifu na neema; ni ufalme wa haki, mapendo na amani; huku wakiyashughulikia mambo ya dunia, na kuyaelekeza kadiri ya mpango wa Mungu. 
Waamini Walei wanaitwa kuyatimiza majukumu yao wenyewe, wakiongozwa na roho ya Kiinjili, ili kumtangaza na kumshuhudia Kristo Yesu kwa imani, matumaini na mapendo thabiti! 
Ili kuonesha na kushuhudia ukaribu wa Kanisa kwa mabaharia, wavuvi pamoja na familia zao, Papa Pio XI, tarehe 17 Aprili 1922, aliridhia kuanzishwa kwa Utume wa Bahari “Opus Apostolatus Maris.” Leo hii kuna jeshi kubwa la watu, wanaojisadaka zaidi kuwadumia mabaharia na wavuvi, katika bandari 300 kwa kutembelea meli zisizopungua 70,000 kwa mwaka. 
Mama Kanisa anawashukuru kwa dhati Mitume hawa, wanaoendelea kujisadaka bila ya kujibakiza, kwa ajili ya huduma makini kwa mabaharia, wavuvi pamoja na familia zao. 
Wadau wa Utume wa Bahari, wamekuwa ni mashuhuda na vyombo vya uinjilishaji wa kina, kwa kuwafunulia watu wa Mungu, ile sura pendelevu ya Mama Kanisa, kwa kuonesha ukaribu wake kwa watu watakatifu wa Mungu, na hivyo kuwahamasisha kujisikia kuwa, ni sehemu hai ya Fumbo la Mwili wa Kristo yaani Kanisa. 
Takribani miaka 100 iliyopita, Dominika ya Utume wa Bahari, imekuwa ni kipindi muafaka cha ujenzi wa misingi ya majadiliano ya kidini, kiekumene na kitamaduni, kutokana na mwingiliano wa watu kutoka katika dini, tamaduni na Mataifa mbalimbali duniani.
Papa Pio XI alitamani sana kuona kwamba, Utume wa Bahari unaendelezwa kwenye Bahari na fukwe mbalimbali za dunia. Roho Mtakatifu, kwa maombezi ya Bikira Maria, aendelee kupyaisha utume na huduma hii, mintarafu mahitaji ya ulimwengu mamboleo! 
Kuna mabaharia ambao dhamiri zao zinahangaika sana, na mara nyingi Mapadri wa maisha ya kiroho, kwa mabaharia na wavuvi, wamekuwa ni msaada mkubwa. 
Mabaharia ni watu wanaofanya kazi zao, katika mazingira magumu na hatarishi, mara nyingi nje ya nchi, makazi na familia zao! 
Mapadri washauri wa kiroho katika muktadha kama huu, wanakuwa ni mashuhuda na vyombo vya Injili ya matumaini, kwa mabaharia na wavuvi waliopondeka na kuvunjika moyo! Mapadri wanapaswa kuwa ni watu wenye huruma, wapole na wanyenyekevu wanapowahudumia mabaharia, wavuvi pamoja na familia zao.

Katika safu hii ya Chimba Chimba Historia ya Kanisa wiki iliyopita, tuliwaletea historia ya kuibuka kwa Madhehebu mengine ya Kiprotestanti. Leo tunaendelea kuwaletea kuibuka kwa Madhehebu ya Kiprotestanti, hususani Uprotestanti chini ya John Calvin. Sasa endelea…

John Calvin 1509-1564:
Kati ya Waprotestanti waanzilishi, Calvin ndiye aliacha nyuma mafundisho ya msingi kwa Waprotestanti.  Calvin alizalilwa mwaka 1509 huko Ufaransa.  Alijifunza elimu dunia ya wakati huo (humanist), vilevile akajifunza Kilatini, Kiyunani na Sheria.  

Mwaka 1533, anasema aliongoka na kuitikia wito wa Mungu kuwa “Chombo cha kutangaza ukweli”. Alipokea wito huo kwa moyo wake wote na kuanza kuhubiri.  

Mwaka 1535, ilimbidi akimbie kutoka Ufaransa na kwenda Basle-Uswizi, kwa sababu ya upinzani dhidi ya mafundisho yake.  

Akiwa Basle, Uswizi, aliandika mafundisho yake ya dini, Teologia, ambayo baadaye aliyaboresha.  Ni muhimu kujua mafundisho haya ya Calvin, kwa sababu madhehebu mengi ya Kiprotestanti hata yale ambayo hayamkubali kama mwanzilishi wake, mafundisho yao yameingiliwa na teolojia yake. 

Calvin kimsingi alifundisha yafuatayo:
1.    Kwanza ya yote, Mungu ni mwenye mamlaka yote.  Yeye ni Muumbaji, Mtegemezaji  na Mtawala.  Yeye yuko juu sana na mwenye uamuzi wote. 

    Yeye huamua anavyotaka, hana sheria inayombana. Hivyo, binadamu hawezi kuungana naye kama walivyofundisha watakatifu, bali la kufanya ni kujiweka chini ya utashi wake na maagizo yake.  Kwa hilo alikuwa karibu na mafundisho ya Waislamu.

2.    Alifundisha kwamba, tangu milele, watu wengine walipangiwa tayari kwenda mbinguni na wengine kwenda motoni (predestination).  Mtu hawezi kufanya lolote kugeuza hilo.  

    Kwa wale waliopangiwa kwenda mbinguni, kuna ishara tatu za kuwatambua.  (a) Kushika imani  ya kweli (b) Maisha ya uadilifu (c) na kushiriki chakula cha Bwana.  

    Yeye na wafuasi wake,  kwa sababu walikuwa na ishara hizo, ilikuwa ni wazi kwamba wamepangiwa mbinguni. Hapo mtu anaweza kusema “Nimeokoka” kwa sababu kama mtu amepangiwa kwenda mbinguni haiwezi kugeuka. 

    Mtu hana uhuru wa kutenda mabaya au mema, kwa sababu yeye ni mwovu, bali Kristo  anamhesabia wokovu.  Hata hivyo yule anayekosa lazima aadhibiwe kwa sababu hakulazimishwa na mtu kutenda mabaya.

3.    Biblia ndio chanzo pekee cha ufunuo, na ishikwe na kufuatwa neno kwa neno kama ilivyoandikwa. 

4.    Kuna Kanisa lisiloonekana na Kanisa linaloonekana. Kanisa lisiloonekana, ni la wale wote waliopangiwa kwenda mbinguni, tangu mwanzo wa nyakati hadi mkamilisho wake.  Kanisa linaloonekana ni la watu wale wanaotimiza masharti  anayoyafundisha.

5.  Anazitambua Sakramenti mbili tu Ubatizo na Ekaristi; lakini sakramenti hizo siyo za lazima kwa wokovu. Katika ibada mbalimbali, anakataza nyimbo, pawepo zaburi tu, vilevile anakataza ibada nzuri, hija, maandamano, sanamu nk. 

6. Katika mafundisho yake alisisitiza sana juu ya umisionari. Alitayarisha watu ambao walikuwa tayari, bila kujali shida kwenda kuhubiri na kuwaongoa watu, kwa mafundisho yake. 
    Walifundisha vikundi na watu binafsi nyumba hadi nyumba. 

7. Hawakumtambua Papa, Maaskofu au Mapadri.  Kwao, kila mmoja aliyebatizwa ni Padri. Hivyo, kiongozi wa ibada huchaguliwa na watu, au huteuliwa na yeye na anaweza kumfukuza wakati wowote.

8.    Kwake mwisho wa dunia, uko mbali, hivyo lazima binadamu afanye kazi sana na kuendeleza ulimwengu.  Faida inayopatikana katika kazi hiyo, isitumike kwa anasa na starehe, bali iwekezwe au kusaidia maskini. 

Hii iliwapa Waprotestanti, nguvu za kipesa na kuhamasisha ubepari.  Hadi leo Waprotestanti wanajua biashara, kuwekeza na kuzalisha kuliko Wakatoliki. 

Askofu Mkuu wa Jimbo Kuu la Dar es Salaam, Mhashamu Sana Jude Thaddaeus Ruwa’ichi (nyuma), Askofu Msaidizi wa Jimbo Kuu la Dar es Salaam, Mhashamu Henry Mchamungu (nyuma), wakiwa katika picha ya pamoja na Viongozi wa Bodi ya Hospitali ya Kardinali Rugambwa, iliyopo Ukonga, jimboni humo, baada ya Maadhimisho ya Miaka 40 ya Hospitali hiyo. Wa tatu kushoto mbele ni Askofu Msaidizi Mteule wa Jimbo hilo, Vincent Mpwaji.

Askofu Mkuu wa Jimbo Kuu la Dar es Salaam, Mhashamu Sana Jude Thaddaeus Ruwa’ichi, akiwa katika picha ya pamoja na viongozi wa Halmashauri ya Walei, Parokia ya Mtakatifu Thoma wa Akwino – Kipunguni, jimboni humo, baada ya adhimisho la Misa Takatifu ya Kutabaruku Kanisa na Altare parokiani hapo.

Askofu wa Jimbo Katoliki Kahama, Mhashamu Christopher Ndizeye (katikati) akiwa katika adhimisho la Misa Takatifu ya Jubilei ya Miaka 25 ya Upadri iliyofanyika katika viwanja vya Kanisa Kuu la Mt. Karoli Lwanga, jimboni humo. Kushoto ni Mwadhama Protase Kardinali Rugambwa na kulia ni Askofu Joseph Mlola wa Jimbo la Kigoma.

Mwenyekiti wa Shirika la Moyo Mtakatifu wa Yesu, Jimbo Kuu la Dar es Salaam, Adolf Mrema (kulia), akimsikiliza Mwenyekiti Mstaafu wa Shirika hilo, Gordon Rwenyagira (kushoto), baada ya Adhimisho la Misa Takatifu ya Kuhitimisha Kampeni ya Tegemeza Tumaini Media ya Moyo Mtakatifu wa Yesu, iliyofanyika katika Parokia ya Mtakatifu Bonaventura – Kinyerezi, Jimbo Kuu la Dar es Salaam.