VATICAN CITY, Vatican

Baba Mtakatifu Fransisko amewataka watu wote waliopewa jukumu la kuwatumikia watu, watekeleze jukumu hilo wakiwajibika kwa unyenyekevu na huruma, badala ya kutumia nafasi zao kuwafanya kuwa chombo cha unafiki, kiburi na wizi.
Aliyasema hayo akiwa katika dirisha la Jumba la Kitume mjini Vatican kwa kuwageukia waamini na mahujaji waliokusanyika katika Uwanja wa Mtakatifu Petro wakati wa Dominika ya Novemba 10, 2024, ambapo alianza kwa kusema, “Leo Injili ya liturujia (Mk 12,38-44) inatuambia kuhusu Yesu ambaye, katika hekalu la Yerusalemu, anashutumu mtazamo wa unafiki wa baadhi ya waandishi mbele ya watu (rej Lk 12, 38-40).
“Wale wa mwisho walikuwa wamekabidhiwa jukumu muhimu katika jumuiya ya Israel: walikuwa wanasoma, waliandika na kutafsiri Maandiko. Kwa hiyo waliheshimiwa sana na watu wakawaheshimu. Zaidi ya kuonekana kijujuu, hata hivyo, tabia yao mara nyingi haikupatana na yale waliyofundisha. Hawakuwa thabiti. Wengine, kiukweli, wenye nguvu katika ufahari na mamlaka waliyofurahia, waliwadharau wengine kwa kuwatazama kuanzia juu hadi chini,” Papa aliongeza kusema, “Ni jambo baya sana kutazama mtu kunzia juu hadi chini,” alisema Baba Mtakatifu.
Baba Mtakatifu alikazia kusema kuwa “Tukumbuke kile ambacho Yesu alisema katika sala ya mtoza ushuru na mfarisayo (Lk 18,9-14). Wao lakini sio wote walitenda kama watu mafisadi, wakichochea mfumo wa kijamii na kidini ambao ulikuwa kawaida kuchukua faida ya wengine, hasa wasio na ulinzi, kwa kutenda dhuluma na kutokujali kabisa.”
Papa amesisitiza kwamba “Kiukweli, kwa neno lake na kielelezo chake, kama tujuavyo, anafundisha mambo tofauti sana kuhusu mamlaka. Anazungumza juu ya hilo kwa njia ya kujitolea na huduma ya unyenyekevu (rej. Mk 10:42-45), juu ya huruma ya umama na ubaba kwa watu (rej. Lk 11:11-13), hasa wale wanaohitaji sana (Lk 10, 25-37).” Kwa njia hiyo Yesu “ Anawaalika wale walio na majukumu kuwatazama wengine, kutoka katika nafasi zao za madaraka, si kuwadhalilisha, bali kuwainua, kuwapa matumaini na msaada.”
Baba Mtakatifu Fransisko aliwataka kujitafakari na kuzitafakari tabia zao katika maeneo yao ya uwajibikaji, akiwasisitiza kuwa wanyenyekevu, na si wenye kujivunia juu ya vyeo walivyo navyo.