DAR ES SALAAM

Na Celina Matuja

Maandalizi ya Kongamano la Tano la Ekaristi Kitaifa litafanyikia Jimbo Kuu Katoliki la Dar es Salaam kuanzia tarehe 11-16 Septemba 2024, katika viwanja vya Msimbazi jijini Dar es Salaam yanaendelea kwa kasi huku majimbo ambayo hayajakamilisha michango, yanaombwa kumalizia.
Akizungumza na Tumaini Letu ofisini kwake, Askofu Msaidizi wa Jimbo Kuu Katoliki la Dar es Salaam, Mhashamu Henry Mchamungu alisema kwamba maandalizi kwa sasa yako katika kiwango cha juu.
Aidha, Askofu Mchamungu alitoa wito kwa Majimbo Katoliki yote nchini kukamilisha michango yao, ili kufanikisha tukio hilo kubwa kwa Kanisa Katoliki Tanzania.
Alifafanua kwamba kila Jimbo katika Metropolitani ya Dar es Salaam, linapaswa kuchangia Shilingi milioni 25/=. Majimbo mengine yanapaswa kuchangia Shilingi milioni sita kila moja.
Askofu Mchamungu alisema kuwa Mashirika ya Watawa yanapaswa kuchangia Shilingi 250,000/= kila moja, Mapadri na Walei watakaoshiriki Kongamano hilo na kupewa malazi, wanapaswa kuchangia Shilingi 250,000/= kila mmoja, na watoto ni Shilingi  65,000/= kila mmoja.
Aidha, kwa Mapadri na Walei ambao watashiriki kwa kutwa tu bila kuhitaji malazi, wanapaswa kuchangia Shilingi 50,000/- tu. Idadi ya washiriki watakaopata chakula na malazi, inatarajiwa kuwa watu 2,811, na idadi ya washiriki wa matukio ya kila siku inatarajiwa kuwa watu 4,811.
Askofu Mchamungu alizitaja mada zitakazofundishwa kwa siku tatu ili kukuza kiwango cha imani kwa Waamini wakiwemo vijana na watoto, ni pamoja na Ekaristi na Maadili, Udugu wa Kikristo kama Nguzo y a Kukuza Utu wa Mwanadamu; Ekaristi na Uponyaji katika Familia. Nyingine ni Ekaristi na Jumuiya Ndogo Ndogo; Historia ya Uinjilishaji katika Kanda ya Mashariki; Ukuu wa Adhimisho la Misa Takatifu; Changamoto ya Upentekoste na Mkatoliki wa Leo.
Kongamano hilo litatanguliwa na Maandamano ya Ekaristi Asubuhi siku ya Jumamosi Septemba 25 mwaka huu.